‘मन्त्रि ज्वालाको राजिनामा आउँदैन, छानबिन समितिनै मान्य छैन’- नेकपा एसका युवा नेता धनराज वास्तविक (भिडियो अन्तर्वार्ता)
१३ पुसमा दुई युवकको मृत्यु हुने गरी भएको बालकुमारी घटनाबारे जाँचबुझ गर्न गठित आयोगले शुक्रबार उपप्रधानमन्त्री तथा गृहमन्त्री नारायणकाजी श्रेष्ठलाई प्रतिवेदन बुझाएको थियो । प्रतिवेदनमा फिल्ड कमाण्डर डीएसपी उमेश लम्साल र निजी सुरक्षा अधिकारी (पीएसओ) बोधराज अधिकारीसँगै मन्त्री ज्वालालाई समेत दोषी किटान गरिएको छ । मन्त्री नगएको भए घटना नहुने समितिको निष्कर्ष छ ।
प्रतिवेदनलाई लिएर प्रमुख प्रतिपक्षी नेकपा एमालेले प्रतिनिधिसभा बैठकको सुरुमै विशेष समय लिएर मन्त्री ज्वालाको राजीनामा मागेको थियो भने राष्ट्रिय स्वतन्त्र पार्टी (रास्वपा)ले सरकारमाथि प्रश्न उठाएको थियो । प्रधानमन्त्री प्रचण्डले भने बालकुमारी घटनाबारे सरकार गम्भीर रहेको जवाफ दिएका थिए ।
गृहमन्त्री श्रेष्ठले छानबिन समितिको प्रतिवेदन आफूले सरकारलाई बझाउने हो कि पार्टीहरुलाई भनेर प्रश्न गरे । त्यसपछि कांग्रेस उपसभापति समेत रहेका रक्षामन्त्री खड्काले यो एउटा दलको सरकार हो कि गठबन्धनको हो भन्ने प्रश्न गरे ।
जाँचबुझ आयोगको प्रतिवेदन आफूले आज मात्र बुझ्ने भन्दै उनले भने, ‘अहिलेसम्म मैले हेरेको छैन, आज क्याबिनेट बस्दैछ । अध्ययन गरेपछि कारबाही गरिन्छ ।’
