युवा संगीतकार शंकर थापा स्माइलको संगीतमा रहेका चारवटै गीतहरु गायनतर्फ प्रथम, द्वितीय र तृतीय साथै गीतकार तर्फ प्रथम
प्रतियोगितामा ममता गुरुङ, खड्ग गन्धर्व र स्वेता मैनाली प्रथम
रेडियो नेपालको ७३ औँ वार्षिकोत्सवका अवसरमा आयोजित आधुनिक गीत प्रतियोगितामा ममता गुरुङको स्वर , स्वेता मैनालीको शब्द रचना र शंकर थापा स्माइलको संगीत रहेको तारा टिपेर माला लाउँछु बोलको गीत प्रथम भएको छ । प्रतियोगितामा स्वेता मैनाली उत्कृष्ट गीतकार र खड्ग गन्धर्व उत्कृष्ट संगीतकार घोषित भएका छन् ।
प्रतियोगितामा गायन तर्फ पाँचथरकी मुना ठटाल द्वितीय र भक्तपुरका सरोज परियारले तृतीय स्थान हासिल गरेका छन् ।
द्वितीय स्थान हासिल गर्न सफल पाँचथरकी मुना ठटालले डिपी खनालको शब्द रचना र शंकर थापा स्माईलको सङ्गीत रहेको ‘कति लाए मनमा मल्हम’ बोलको गीत गाएकी थिइन् भने परियारले पनि डिपी खनालकै शब्द रचना र शंकर थापाकै संगीत रहेको ‘बन्द भो त्यो आवाज’ बोलको गीत गाएका थिए ।
प्रतियोगीताको निर्णायक भूमिकामा बरिष्ठ गायक, संगीतकार तथा गीतकारहरु बुलु मुकारुङ, गुरुदेव कामत,सुनिता सुब्बा र डा.गीता त्रिपाठी थिए ।
संगीतकार तर्फ उत्कृष्ट हुन सफल खड्ग गन्धर्वले संगीतकार बुलु मुकारुङ ,शास्त्रीय गायक तथा संगीतकार गुरुदेव कामत, गायिका सुनिता सुब्बा र गीतकार डा. गीता त्रिपाठी प्रति धन्यबाद ब्यक्त गरेका छन् ।
सञ्चार तथा सूचना प्रविधि मन्त्रालयका सह सचिव नेत्रप्रसाद सुवेदीको प्रमुख आतित्थ्यमा सम्पन्न रेडियो नेपालको ७३ औँ वार्षिकोत्सवका अवसरमा आयोजित आधुनिक गीत प्रतियोगितामा सुवेदीले गीत सङ्गीतले व्यक्ति,परिवार, समाज र राष्ट्रलाई सह मार्गमा डोर्याउनुका साथै चेतना अभिवृद्धि गर्न महत्वपूर्ण भूमिका खेल्ने बताए । कार्यक्रममा रेडियो प्रसार सेवा विकास समिति (रेडियो नेपाल)का कार्यकारी निर्देशक बुद्धिबहादुर केसीले रेडियो नेपाल नेपाली गीत सङ्गीतको जननी भएको भन्दै गीत सङ्गीतको संरक्षण,सम्बर्धन र प्रबर्धनमा रेडियो नेपालको योगदान उल्लेख्य रहेको बताए ।
वि सं २०२२ साल देखी सुरु गरिएको आधुनिक गीत प्रतियोगितामा यो पटक मुलुकभरबाट ३० जनाको सहभागिता रहेको थियो ।