नयाँ सरकार बन्ने बेला वा मन्त्रिमण्डल पुनर्गठन हुने बेला नयाँ अर्थमन्त्री कस्तो हुनुपर्छ वा को हुँदा राम्रो होला भन्ने चासो चिन्ता हने गर्दछ ।
पार्टीलाई आर्थिक स्रोत जुटाउन सक्ने मान्छे अर्थमन्त्री बनाउनु पर्छ भन्ने सोचाइ शीर्ष नेतामा विकसित हुँदै गएकाले खास व्यवसायीका निकट राजनीतिज्ञ अर्थमन्त्री हुने गरेको पाइन्छ भन्नेहरु पनि छन् । अर्थमन्त्रीमा प्राविधिक ज्ञान वा अर्थतन्त्रका विषयमा राम्रो दखल हुनुपर्छ भन्ने विषय भन्दा अन्य निजि स्वार्थ चाहे त्यो व्यतिको होस् वा पार्टीको हावी हुने गरेको भन्ने पनि सुनिन्छ ।
तर अब सचेत जनमानसमा अर्थतन्त्रको जानकार व्यक्ति अर्थमन्त्री चाहिन्छ भन्ने सचेतना बढेसँगै, खासगरी श्रीलंकाको अर्थतन्त्र बिग्रिएको समचार पछि अर्थमन्त्रि को बन्नला वा को बने देशको कोभिड-१९ महामारीले निस्तेज बनेको अर्थतन्त्र तङ्ग्रिएला भन्ने धेरैको चासो बढ्न थालेको पाइन्छ । यसै बिषयमा नेपाल सरकारका पूर्व सचिव रामेश्वर खनालले संचार माध्यमका लागि तयार पारेको विचार यस्तो छ
नयाँ सरकार बन्ने बेला वा मन्त्रिमण्डल पुनर्गठन हुने हल्ला चल्दा नयाँ अर्थमन्त्री कस्तो हुनुपर्छ भनेर उद्योग वाणिज्य सङ्घका पदाधिकारीले औपचारिक कार्यक्रममा खासै केही भनेको विगतमा सुनिँदैनथ्यो।
कोठे बहसमा आफूलाई मनपर्ने व्यक्तिको नाम पक्कै लिन्थे। सरकारी नीति आफ्नो पक्षमा पार्न सके व्यवसायमा आफ्नो प्रतिद्वन्द्वीलाई सोतर पार्न सकिन्छ भन्ने विश्वास गर्ने केही व्यवसायी पछिल्लो एक दशकमा शीर्ष नेता कहाँ आफ्नो सिफारिसको व्यक्तिलाई अर्थमन्त्री बनाइदिन धाउन थालेका थिए। अर्थमन्त्री हुने उत्कट चाहना राखेका राजनीतिज्ञ पनि व्यवसायीको सहयोगको अपेक्षा राख्थे। पार्टीलाई आर्थिक स्रोत जुटाउन सक्ने मान्छे अर्थमन्त्री बनाउनु पर्छ भन्ने सोचाइ शीर्ष नेतामा विकसित हुँदै गएकाले खास व्यवसायीका निकट राजनीतिज्ञ अर्थमन्त्री हुने प्रपञ्च सफल हुन्थ्यो। अर्थमन्त्रीमा प्राविधिक ज्ञान वा अर्थतन्त्रका विषयमा राम्रो दखल हुनुपर्छ भन्ने विषय गौण हुन पुगेको थियो।