किन आवश्यक पर्छ अर्थशास्त्र बुझेकै अर्थमन्त्री

>सरकारी वित्त सन्तुलनमा ल्याउन चल्नुपर्ने कदम निश्चित रूपमा लोकप्रिय हुन सक्दैनन्। समष्टिगत रूपमा वित्तीय क्षेत्रमा भएको क्षयीकरण नियन्त्रण र वित्तीय क्षेत्रको स्थायित्व हासिल गर्न चालिने कदम पनि लोकप्रिय हुन सक्दैनन्। बाह्य क्षेत्रमा देखिएको सुधार दिगो बनाउन चालिएका कदम मध्ये केही अलोकप्रिय कदम तत्कालै सम्पूर्ण रूपमा फिर्ता लिनसक्ने र मौद्रिक नीतिलाई सरोकारवालाले चाहे बमोजिमको लोकप्रिय बनाउन सकिने गुन्जाइस छैन। यी कदम अलोकप्रिय मात्र होइन, यससम्बन्धी निर्णय गर्न र सम्बन्धित सरकारी र नियमनकारी निकायबाट काम गराउन पनि अर्थशास्त्रीय प्राविधिक ज्ञान आवश्यक पर्छ। यसै कारणले पनि यस पटक प्राविधिक जानकारी भएको व्यक्ति अर्थमन्त्री बनाइनु पर्छ भन्ने आवाज उठेको हुनुपर्छ। यो आवाजलाई बल पुग्ने कारण पनि छ। विद्यमान स्थितिमा लोकप्रिय हुने काम गर्न र पार्टी कोषका लागि पैसा उठाइदिन नसकिने भएकोले विगत दश वर्षमा जस्तो अर्थशास्त्र र अर्थतन्त्रको कत्ति पनि ज्ञान नभएको व्यक्तिले अर्थमन्त्रीको पदमा दाबी प्रस्तुत गर्ने सम्भावना कम छ। राजनीति भनेको “सम्भावनाको कला” हो भनेर जो कसैलाई पनि अर्थमन्त्री बनाइने हो भने सरकार स्वयम् त समस्यामा पर्ने छ, आम नागरिकले पनि बेलाबेला “यस्तो मुलुक जस्तो भइएला” भनेर उदाहरण प्रस्तुत गरिने मुलुकका नागरिकले पाए जस्तै दु:ख पाउनु पर्ने हुनसक्छ।

नोटः यो लेख बीबीसीका  संचारकर्मीको  अ नुरोधमा नेपाल सरकारका पूर्व सचिव रामेश्वर खनालले तयार पारेका हुन्।